Johan Oscar Smith alikuwa mtu aliyemcha Mungu mwenye hekima nyingi na uelewa wa Neno la Mungu. Tunaweza kuona kidogo hekima hii kwa kusoma baadhi ya nukuu zake hapa chini. Misemo hii mifupi, iliyochukuliwa kutoka katika vitabu vyake, jumbe, na mazungumzo ya kila siku, inaonyesha si tu maisha ya kina ya kiroho katika Kristo bali pia unyenyekevu wa kina na umaskini wa roho.
Ukweli
“Kwa sababu kila kweli ina nguvu ya kutuweka huru, mtu anayetembea katika kweli katika njia zake zote atawekwa huru. Hata uongo “mdogo” huzipa nguvu za giza nafasi ya kushambulia, lakini kweli huzifukuza.”
Haki
“Ni watu wachache tu wanaojua haki ni nini. Ni jambo la haki kuteseka kutokana na matokeo ya upumbavu wako mwenyewe. Unapotenda dhambi, ni jambo la haki kuvumilia matokeo ya dhambi yako bila kulalamika. Kuwa mkweli na kusema yaliyo moyoni mwako unaposhughulika na watu wengine pia ni jambo la haki. Wale walio na njaa na kiu ya haki watashibishwa (Mathayo 5:6)—na kushibishwa kwa haki ni jambo kuu sana.”
Juu ya msalaba na chini ya msalaba
“Wote walio wa Kristo Yesu wameusulubisha mwili na shauku zake pamoja na tamaa zake (Wagalatia 5:24), lakini huwezi kufanya hivyo chini ya msalaba. Wale waliomsulubisha Yesu pia walisimama chini ya msalaba. Kusimama tu hapo hakuusababishii mwili maumivu yoyote; lakini unaposulubiwa pamoja na Yesu, utakuwa na ushirika wa mateso yake (Wafilipi 3:10).”
Sikia na utende
“Yakobo anasema kwamba unajidanganya nafsi yako ikiwa unasikia tu Neno la Mungu lakini hulifanyi. Watu wengi huishi hivi maisha yao yote – wakisikia Neno la Mungu tena na tena, lakini hawajaribu hata kidogo kufanya wanayosikia!”
Fanya kazi zake
“Mungu hupanda Roho Wake na bidii ndani ya mioyo yetu ili kufanya kazi ndani yetu. Kazi inapokamilika, pumziko tulivu hubaki. Hatuhitaji kuwaweka wengine kando, kwa sababu Mungu amepanga kazi zetu ili tusikwazane. Tunachopaswa kufanya tu ni kuhakikisha kwamba tunafanya kazi Zake.”
Uhuru wa uongo
“Uhuru wa uongo pia ni sababu inayowafanya watu wabuni mafundisho yanayosema kwamba hatuhitaji kuteseka. Fundisho moja kama hilo linasema kwamba Yesu amefanya kila kitu, kwa hiyo hatuhitaji kupambana na asili yetu ya dhambi au mapenzi yetu ya kibinafsi. Tunaona pia uhuru huu wa uongo watu wanapowadhihaki wale wanaojitahidi kuishi maisha ya kumcha Mungu, na kusema kwamba watu hao wanaishi utumwani.”
Hukumu ya milele
“Hii ndiyo hukumu ya milele: kwamba mambo ya duniani tuliyoyapenda yatapita, huku nafsi yetu ya milele ikijaa utupu tu badala ya kujazwa na Mungu Mwenyewe. Ndiyo maana ni muhimu sana kuelekeza fikira zetu ndani, kwenye chanzo cha uzima kinachoishi milele, kama vile sisi wenyewe tutakavyoishi milele.”
Vita ya ndani
“Tuna maisha ya ndani na maadui wa ndani ambao tunapaswa kupigana nao, kuwashinda na kuwaangamiza. Maadui hawa ni tamaa zinazojaribu kutukengeusha kwa kufanya mawazo yetu yakazie mambo ya nje, mambo yatakayopita.”
Pambano la imani
“Hakuna mtu anayeweza kutoka gizani na kuingia nuruni au kutoka chini ya nguvu za Shetani na kumgeukia Mungu bila kupitia vita vikubwa na kupigana vita vizuri vya imani. Hatupati nuru kamili kwa siku moja. Tunahitaji kuwa waaminifu sana ili Mungu atupe nuru zaidi.”
Uvumilivu
“Mtu mwenye saburi atavumilia pale ambapo wengine hukata tamaa. Sikuzote hufikiria jinsi Mungu alivyokuwa na saburi kwake, naye huiona saburi ya Mungu kuwa wokovu (2 Petro 3:15). Saburi huvumilia pale ambapo hakuna mwingine awezaye kuvumilia, na daima hutumaini matokeo mema mwishoni.”
Tumia muda wako
“Watu wangeweza kufanya mengi zaidi ikiwa tu wangejitahidi zaidi. Lazima uwajibike kwa maisha yako mwenyewe. Kuwa mwangalifu kuhusu jinsi unavyotumia muda wako na kile unachosikiliza! Simamia mambo yako yote kwa uangalifu, ili Mungu apendezwe nawe. Tafuta kumletea Mungu heshima katika kila jambo unalofanya.”
Uaminifu katika nuru
“Ikiwa mtu anasonga mbele kwa ujasiri katika nuru lakini ameacha kuwajali wengine, kusudi la nuru linapotea. Mungu anapotupa nuru, ni ili tufanye jambo fulani katika nuru hii.”