Maana ya kweli ya kuwa mpole ni nini?

Yesu alisema, “Heri wenye upole; Maana hao watairithi nchi.” Mathayo 5:5. 

Neno “mpole” linaweza kwa urahisi kuonekana kama kitu kibaya. Mara nyingi watu hufikiri kwamba kuwa mpole kunamaanisha kuruhusu wengine wakutendee vibaya, au kuwa na woga na kuogopa kusema.  

Upole na kuwa na woga ni vitu vinavyopingana 

Upole na roho ya utulivu huenda pamoja. Kuwa mpole kamwe hakupaswi kuchanganywa na kuwa na woga au kuogopa kusema. Roho ya woga ni kinyume kabisa cha roho ya upole! Utulivu unaotokana na upole hutoka katika kumtumaini Bwana, lakini utulivu unaotokana na aibu na woga hutoka katika kutomtumaini. 

Hatupaswi kufikiri kwamba mtu mpole huwa kimya kila wakati. Yeye huwa kimya anapopaswa kuwa kimya - kama anapotukanwa au kutendewa isivyo haki, wengine wanapokasirika, wanapozungumza tu juu ya mambo ya kila aina, wanapopigania faida yao wenyewe, n.k. Lakini si kimya anapopaswa kulilia msaada wa Mungu mchana na usiku, au anapopaswa kuinua sauti yake kama tarumbeta ili kuwaambia watu wa Mungu dhambi zao (Isaya 58:1); au anapopaswa kutetea waziwazi kweli za injili; au kumuokoa mwana-kondoo kutoka kinywani mwa simba. 

Asili ya kimungu ina pande mbili. Inanyamaza inapopaswa kunyamaza, na inaweza kuwa na sauti kama ya ngurumo inapopaswa kuwa hivyo. Asili ya dhambi pia ina pande mbili. Huwa na sauti inapopaswa kunyamaza, na huwa kimya na yenye woga inapopaswa kupaza sauti kwa nguvu zote iwezavyo. 

Kuwa mpole huleta wokovu 

“Wala mtu huyo Musa alikuwa mpole sana, kuliko watu wote waliokuwa juu ya uso wa nchi.” Hesabu 12:3. Lakini alipomwona yule ndama wa dhahabu na kucheza-cheza, akazitupa zile mbao za sheria kutoka mikononi mwake na kuzivunja (Kutoka 32:19). Na Yesu, ambaye anatuambia tujifunze upole kutoka Kwake, alikuwa amejaa bidii kiasi kwamba aliipindua meza za wabadili fedha na kuwafukuza kutoka hekaluni kwa mjeledi (Yohana 2:13-17). Hatupaswi kujaribu kuwa kimya katika hali hizi. 

Tunasoma katika Yakobo 1:21 kwamba tunapaswa kulipokea kwa upole lile neno lililopandikizwa ndani yetu. Neno linapotuhukumu na kuturekebisha, linapotenganisha roho na nafsi, viungo na mafuta ya mifupa (Waebrania 4:12), linapotuvunja na kutunyenyekeza, linapotuvua kabisa - basi ni muhimu sana kuwa kimya na mpole na kukubaliana kwamba Neno ni sahihi. Ndipo tunahitaji kunyamaza badala ya kujibu, kujitetea na kutoa visingizio! Ndipo tutaelekezwa mbele zaidi katika njia ya uzima na tutaokolewa zaidi na zaidi, hatua kwa hatua.