Je, unapaswa kuwa na umri gani ili kuishi maisha ya mwanafunzi?
Je, unapaswa uwe na umri gani ili uwe mtumishi wa Mungu?
Je, unapaswa kuwa na umri gani ili kuishi maisha ya ushindi?
Je, unapaswa kuwa na umri gani kabla ya kufanya mapenzi ya Mungu?
Ni rahisi kusema "mimi ni mdogo sana" kufanya hili au lile. Mdogo sana kuelewa kweli. Mdogo sana kufanya tofauti. Mdogo sana kuwa na manufaa. Mdogo sana kumtumikia Mungu. Inaweza kuonekana kuwa haiwezekani. Au labda unahisi tu kama hauko tayari kuifanya bado.
Hadithi ya Yeremia
Kuna hadithi katika Biblia kuhusu kijana aliyehisi hivyo. Yeremia alikuwa kijana sana Mungu alipomwambia kwamba alikusudiwa kuwa nabii kwa Israeli. (Wengine wanasema alikuwa na umri wa miaka 17 tu!) Pengine alifikiri, “Lazima kuwe na mtu mwingine ambaye angekuwa chaguo bora zaidi kufanya hivi. Hakuna mtu atanisikiliza hata hivyo. Siwezi kufanya hivi.” Bila shaka, hatujui ikiwa hivi ndivyo Yeremia alifikiria kweli, lakini hebu fikiria ni mawazo gani yangekuja kichwani mwako katika hali kama hiyo.
Kwa hiyo Yeremia akamwambia Mungu, "Aa Bwana MUNGU! Tazama , siwezi kusema, mimi ni mtoto." Yeremia 1:6.
Yeremia alikuwa anaona nini? Alikuwa akiona anachojua juu yake mwenyewe. Angeweza kufanya nini kama kijana wa kawaida. Lakini kile alichopaswa kuona na kile ambacho Mungu alimwonyesha, ndicho angeweza kufanya Mungu alipokuwa pamoja naye. Hakukuwa na kikomo cha umri kwa kazi ambayo Mungu alikuwa akimpa. Alichohitaji kufanya ni kumtii Mungu na Mungu angefanya mengine kupitia yeye.
“Lakini Bwana akaniambia, Usiseme, Mimi ni mtoto. Maana utakwenda kwa kila mtu nitakayekutuma kwake nawe utasema kila neno nitakalokuamuru. Yeremia 1:7-8.
Hadithi ya Yeremia ni mfano mzuri kwa kijana wa leo!
Wewe si mtoto!
Kwa hiyo usijisikie kama wewe ni mtoto! Je, ni nini hasa ambacho Mungu anakuomba?
"Mtu ye yote akitaka kunifuata na ajikane mwenyewea, ajitwike msalaba wake kila siku, anifuate." Luka 9:23
Hii ina maana kwamba tunapaswa kuacha mapenzi yetu wenyewe na kufanya kile tunachojua ni sahihi wakati huu. Unapokuwa mdogo unapoanza kufanya hivi, ni bora zaidi! Unaweza kupata maisha ndani ya Kristo kutoka katika umri mdogo na unaweza kukua katika Mungu. Unaweza kuhifadhiwa kutokana na uovu duniani, unaweza kuokolewa kutoka kwenye dhambi katika asili yako ya kibinadamu na maisha yako yatakuwa mazuri na safi na huru!
Labda unahisi kama haiwezekani kwako. Unajijua vizuri na unahisi kuwa wewe mwenyewe hauwezi kufanya. Lakini Mungu atakuwa pamoja nawe, kama alivyokuwa pamoja na Yeremia! Atampa mtu yeyote anayetaka kumtumikia uwezo na msaada ili jambo hilo lifanikiwe kwako daima, kama ilivyoandikwa katika 2 Mambo ya Nyakati 16:9, “Kwa maana macho ya Bwana hukimbia kimbia duniani mwote, ili ajionyeshe mwenye nguvu kwa ajili ya hao waliokamilika moyo kuelekea kwake .”
Kuwa mfano
Na usiruhusu mtu mwingine akuambie wewe ni mdogo sana! Wakati Timotheo alipokuwa mdogo kabisa alikuwa mfanyakazi mwenza aliyeaminiwa zaidi na Paulo na alipata majukumu mengi katika kanisa. Pengine kulikuwa na watu wenye umri mkubwa kuliko Timotheo waliofikiri kwamba huo ulikuwa uamuzi usiofaa, lakini Paulo akamwambia hivi: “Mtu awaye yote asiudharau ujana wako, bali uwe kielelezo kwao waaminio, katika usemi na mwenendo na katika upendo na Imani na usafi.” 1 Timotheo 4:12.
Wewe sio mdogo sana kuwa mfano. Wewe sio mdogo sana kushinda dhambi. Wewe sio mdogo sana kuchukua jukumu kwa maisha yako na kufanya maamuzi sahihi. Unaweza kuanza leo kufanya kile ambacho unajua ni sawa, na hautalazimika kuacha!
Chagua leo kufanya mema! Chagua leo kuacha mapenzi yako ili uweze kufanya mapenzi ya Mungu duniani! Chagua leo kushinda unapojaribiwa! Chagua leo kuishi kwa ajili ya Mungu badala ya nafsi yako!
Jifunze kutokana na hadithi ya Yeremia na kutoka kwenye mfano wa Timotheo. Una nguvu, una shauku. Je! unajua ni wakati na nguvu ngapi unazotoa kwa vitu ambavyo unajali sana? Hiyo ndiyo aina ya nguvu na shauku unayoweza kutumia kumtumikia Mungu, kufanya mapenzi Yake na kushinda katika majaribu ya maisha yako ya ujana.