“Kumbukeni kwamba wakati ule mlikuwa mbali na Kristo, mkiwa mmetengwa kutoka jumuiya ya Israeli, na mkiwa wageni katika yale maagano ya ahadi, nanyi hamkuwa na tumaini wala Mungu duniani.” Waefeso 2:12.
Watu wa Israeli walikuwa na agano, au makubaliano, na Mungu, na agano hili liliwapa ahadi nyingi za ajabu. Lakini ikiwa hawakuwa waaminifu na hawakushika upande wao wa agano, waliadhibiwa na kurekebishwa. Katika Mlima Sinai, Mungu alikuwa amewapa amri za kuzishika.
Aina mpya ya agano na Mungu limefanywa
Kwa hiyo, Kristo alipokuja duniani, alisema: “Dhabihu na sadaka hukuzitaka, bali mwili uliniandalia; sadaka za kuteketezwa na za dhambi hukupendezwa nazo. Ndipo niliposema, ‘Mimi hapa, nimekuja, imeandikwa kunihusu katika kitabu: Nimekuja kuyafanya mapenzi yako, Ee Mungu.’” Waebrania 10:5-7.
Hili ndilo agano ambalo Yesu alifanya na Baba yake. Halikuwa tu kuhusu kuzishika amri fulani, bali kuhusu kufanya mapenzi ya Baba katika kila jambo. Ilimpasa ajitoe dhabihu ili kujifunza utii (Waebrania 5:8; Waebrania 9:14). Ilimbidi aachane na mapenzi yake mwenyewe; ilimbidi afe ili afanye mapenzi ya Baba (Yohana 6:38), na Mungu alimfufua Yesu, Mchungaji wetu mkuu, kutoka kwa wafu kupitia damu ya agano la milele (Waebrania 13:20). Ahadi za agano hili ni kubwa zaidi kuliko ahadi za agano la kale.
Mungu hakuweza kufanya agano hili jipya pamoja na taifa zima, bali Yesu anasema, “Kondoo wangu huisikia sauti yangu nami nawajua, nao hunifuata.” Yohana 10:27. Hili si kwa Wayahudi tu, bali kupitia kuhubiriwa kwa injili ya Kristo, kondoo hawa hukusanywa kutoka miongoni mwa watu na mataifa yote. Yesu alisema, “Nao hunifuata.” Wanaingia katika agano lile lile kama Yesu.
Tunapobatizwa, tunashuhudia kwamba tumeingia katika agano lile lile kama Yesu. “Hamjui ya kuwa sisi sote tuliobatizwa katika Kristo Yesu tulibatizwa katika mauti yake?” Warumi 6:3. Hiki ni kifo cha utashi wetu binafsi, ili tuweze kuishi maisha mapya kulingana na mapenzi ya Baba, kama vile Yesu alivyofanya. Kisha Yesu anakuwa Mchungaji wetu, na tutashiriki katika damu ile ile ya agano. Hii pia hutupa haki ya kufufuliwa kutoka kwa wafu, yaani, unyakuo tutakapokutana na Yesu mawinguni (Warumi 6:4-5; 1 Wathesalonike 4:16-17).
Ahadi za agano
Ahadi zote za agano zitatimizwa ndani yetu ikiwa tutakuwa waaminifu kwa agano—tuna haki nazo. Zisome, nazo zitauchangamsha moyo wako ikiwa unaamini. Kwanza kabisa, huhitaji tena kuwa na wasiwasi kuhusu mahitaji yako ya duniani; mambo unayohitaji yatapewa ikiwa utafanya mapenzi ya Mungu (Mathayo 6:31-34).
Pia mtashiriki katika hali ya uungu na kuepuka uharibifu ulio katika ulimwengu (2 Petro 1:4.) Ninyi mnakuwa warithi wa Mungu na mtatukuzwa pamoja na Yesu (Warumi 8:17). Mtaketi pamoja na Yesu juu ya kiti chake cha enzi, kama vile yeye alivyoketi pamoja na Baba yake juu ya kiti chake cha enzi (Ufunuo 3:21.) Tungeendelea hivi bila mwisho. “... hakuna jicho limepata kuona, wala sikio kusikia, wala hayakuingia moyoni mwa mwanadamu, mambo ambayo Mungu amewaandalia wale wanaompenda.” 1 Wakorintho 2:9.
Wale wanaompenda ndio wanaozishika amri zake. ( Yohana 14:15). Wao ni waaminifu katika agano kama vile Mchungaji Mkuu wa kondoo alivyo waaminifu, nao wataishi pamoja naye katika utukufu. (2 Timotheo 2:11-12.)